Монголын Засгийн газар Францын Төрийн өмчит "Орано" Төрийн өмчит групптэй Зөөвч-Овоогийн ураны төсөл дээр Хөрөнгө оруулалтын гэрээ байгуулахаар болсон. Хөрөнгө оруулалтын гэрээг өнгөрсөн 2023 оны арванхоёрдугаар сард байгуулахаар анх товлосон боловч гадаад дотоодын хүчин зүйлээс шалтгаалан тодорхойгүй хугацаагаар хойшилсон. Гадаад талаасаа ОХУ-аас сөрөг хандлага үзүүлж байгаа бол дотоодын хүчин зүйл нь УИХ-ын ээлжит сонгууль ойртсонтой холбоотой байв. Өөрөөр хэлбэл, УИХ-ын ээлжит бус сонгуулийн дараа шинэ Засгийн газартай Хөрөнгө оруулалтын гэрээг байгуулахаар хоёр тал хүлээлтийн байдалд орсон гэх албан бус мэдээлэл цацагдсан.
Тэгвэл ирэх аравдугаар сард Францын "Орано"-тай хөрөнгө оруулалтын гэрээг байгуулж, Зөөвч-Овоогийн ураны төслийг эхлүүлэхээр төлөвлөж байгааг талаар Аж үйлдэр, эрдэс баялгийн сайд өнөөдрийн /2024.08.16/ чуулганы хуралдаан дээр ам алдав.
Францын "Орано" групптэй хэлэлцээр хийх ажлын хэсгийг шинэчлэн байгуулж, ЗГХЭГ-ын дарга Н.Учрал ахлах болсон байна. Парисын олимпийн нээлтийн үеэр Монгол Улсын Ерөнхийлөгч У.Хүрэлсүх, Францын удирдагч Э.Макрон хоёр энэ асуудлаар ярилцсан байна.
2010 онд Зөөвч-Овоо ордыг илрүүлсэн агаад ураны нөөц нь 93 мянган тонн. Тус ордыг эзэмшигч “Бадрах Энержи” компанийн 66 хувийг Францын төрийн өмчит "Орано Майнинг" компани, Монголын Засгийн газрын 34 хувийг “Эрдэнэс Монгол” компанийн охин компани болох “Мон Атом” эзэмшдэг юм байна. Зөөвч-Овоо уурхайд нийт 1.7 тэрбум ам.долларын хөрөнгө оруулалт хийх юм.
Төсөл 50 жил үргэжилнэ. Монгол Улсын Засгийн газар төрийн эзэмшлийн эзэмших хувийг 10 хувийн давуу эрхтэйгээр үнэ төлбөргүй эзэмшинэ. Монгол Улсын Засгийн газар ямар нэг хөрөнгө оруулалт хийхгүй байхаар тохирсон. Түүнчлэн уг төслийн хүрээнд Монгол Улсад жилдээ 5.5 сая ам.доллар, нийтдээ 3.2 тэрбум ам.долларын татварын орлого төвлөрүүлэхээр тооцоолол гаргасан байна.